Ritstjóri WikiLeaks, Kristinn Hrafnsson, gagnrýnir harðlega afstöðu íslenskra stjórnvalda til þátttöku listamanna á Feneyjartvíæringurinn í nýrri Facebook-færslu.

Í færslunni bendir hann á að á meðan rætt sé um að útiloka rússneska listamenn vegna innrásar Rússlands í Úkraínu, sé ekki beitt sömu mælistiku gagnvart öðrum ríkjum.

Hann nefnir að fulltrúi Íslands á tvíæringnum verði Ásta Fanney Sigurðardóttir og að þátttaka hennar sé óumdeild. Á sama tíma hafi Logi Einarsson, menningarmálaráðherra, hvatt til þess að þátttaka rússneskra listamanna verði sniðgengin vegna stríðsins í Úkraínu. Kristinn skrifar:

„Hópur ungra rússneskra listamanna mun fylla skála landsins af list, það er að segja ef ekki verður strækað á þáttökuna eins og Logi Einarsson, menningarmálaráðherra hefur hvatt til. Af því Pútín sendi heri sína inn í Úkraínu og hefur framið þar óhæfuverk.“

Kristinn bendir hins vegar á að listamenn frá Bandaríkjunum og Ísrael taki einnig þátt, þrátt fyrir að stjórnvöld þeirra landa hafi staðið að hernaðaraðgerðum sem sætt hafa harðri gagnrýni.

Hann nefnir sérstaklega myndhöggvarann Alma Allen sem fulltrúa Bandaríkjanna og ísraelska listamanninn Bela-Simion Fainaru, og spyr hvers vegna ekki sé kallað eftir því að þeir verði útilokaðir á sama hátt.

„Nú hefur Trump, forseti hans ráðist inn í Íran og drepið þar mann og annan og ekki undanskilið á annað hundrað skólastúlkur. Þess utan hefur hann hótað að eyða allri siðmenningu í Íran og væntanlega mun þá öll listsköpun hverfa. Logi ráðherra hefur ekki lýst því yfir að hann vilji að Alma Allen sé meinað að mæta með list sína til Feneyja þrátt fyrir þetta. Á þessari hátíð mun Ísrael einning senda listmanninn Belu-Simion Fainaru sem mun setja þar upp verk sem með strúktúrum og vatni endurspeglar svart tómið sem ku vera vísan í Kabbala dulhyggju gyðingdóms. Benjamin Netanyahu forsætiráðherra Belu-Simion hefur verið að dunda sér við þjóðarmorð og slátrun á tugþúsundum barna. Ég hef ekki séð ákall Loga ráðherra um að listmanninum Belu-Simion sé úthýst frá Feneyjum vegna þessara gjörða pólitískrar forystu í hans heimalandi.“

Í færslunni vitnar hann til rökstuðnings hóps evrópskra ráðherra, þar á meðal Loga, um að þátttaka Rússa geti „varpað upp mynd lögmætis og alþjóðlegrar viðurkenningar“ sem samræmist ekki stríðsrekstri þeirra.

Kristinn spyr að lokum hvort sömu rök eigi ekki við um önnur ríki og hvort vænta megi frekari viðbragða frá ráðherranum:

„Telur Logi ráðherra þá að þáttaka listamanna frá Ísrael og Bandaríkjunum „varpi upp mynd lögmætis og alþjóðlegrar viðurkenningar“ á árásarstríði, stórfelldum stríðsglæpum, aðskilnaðarstefnu, landráni og þjóðarmorði? Eða er von á framhaldstilkynningu frá ráðherra?“