Atli Þór Fanndal, skrifstofustjóri rektors við Háskólann á Bifröst, gagnrýnir ummæli Nönnu Margrétar Gunnlaugsdóttur, þingkonu Miðflokkurinn, um fjölda nema frá Nígeríu á Íslandi.

Í Facebook-færslu sem hann birti í kjölfar umræðu á Alþingi lýsir Atli yfir furðu á gagnrýni þingkonunnar á umsóknir nígerískra nemenda. Hann bendir á að fólk frá Nígeríu fylgi einfaldlega þeim reglum sem gilda um komu til landsins í gegnum nám.

„Fólk frá Nígeríu er að sækja um í gegnum kerfi sem hannað er þannig að ef þau vilja koma hingað löglega þá verður fólk frá Nígeríu að sækja um heimild til að læra hér,“ skrifar hann.

Hann segir jafnframt ósamræmi í málflutningi Miðflokksins, sem hafi kallað eftir hertari reglum um komu erlendra ríkisborgara til landsins en gagnrýni nú fólk fyrir að fylgja gildandi ferlum.

„Miðflokkurinn hefur ekkert á móti fólki frá útlöndum sko en er ekki rosalega undarlegt að þau séu að fylgja reglunum og sækja um heimild til að vera hér ef þau ætla í nám… þessi flokkur er ófær um að hugsa heila hugsun,“ skrifar Atli.

Í færslunni leggur hann áherslu á að um sé að ræða afleiðingu kerfis sem stjórnvöld hafi sjálf sett upp og að umsóknir séu eðlilegur hluti þess ferlis. „Þetta er kerfið. Þau kalla eftir meiri stífni gagnvart því að koma hingað en svo er það rosalega spes að fólk fylgi reglunum og sæki um,“ bætir hann við.