Karlmaður með óþekkt lögheimili í Frakklandi hefur verið ákærður fyrir brot gegn lögum um farþegaflutninga og farmflutninga á landi auk umferðarlaga eftir ætlaðan ólöglegan atvinnuakstur á Selfossi.
Samkvæmt ákæru Lögreglustjórans á Suðurlandi er maðurinn sakaður um að hafa mánudaginn 7. apríl 2025 ekið bifreið um Austurveg við Eyraveg á Selfossi við farþegaflutninga í atvinnuskyni í ferðaþjónustu.
Í ákærunni kemur fram að hann hafi hvorki haft tilskilin ökuréttindi fyrir slíkan akstur né gilt rekstrar- og ferðaþjónustuleyfi. Lögregla stöðvaði aksturinn á vettvangi.
Málið er talið varða brot gegn lögum um farþegaflutninga og farmflutninga á landi sem og umferðarlögum.
Þess er krafist að ákærði verði dæmdur til refsingar og greiðslu alls sakarkostnaðar.
Málið verður þingfest fyrir Héraðsdómi Suðurlands þann 10. september.
