28 ára gamall karlmaður var úrskurðaður í gæsluvarðhald, í Danmörku fyrr í dag, grunaður um að hafa keypt dróna sem átti að nota í „hryðjuverkaárás“ fyrir hönd Hamas, að sögn danska leyniþjónustunnar PET.
Flemming Drejer, stjórnandi hjá PET, sagði í yfirlýsingu að talið væri að „þessi einstaklingur hafi keypt dróna sem átti að nota af Hamas í hryðjuverkaárás á óþekktum stað í Danmörku eða erlendis“. Maðurinn kom fyrir dóm í dag og var úrskurðaður í gæsluvarðhald til 11. júní.
PET sagði málið tengjast bæði Hamas og skipulagðri glæpastarfsemi í Danmörku og vísaði til fjölda handtaka í desember 2023 sem hluti af aðgerð til að koma í veg fyrir meint skipulagt „hryðjuverkaárás“.
Sex einstaklingar voru úrskurðaðir í gæsluvarðhald þá þar á meðal þessi 28 ára gamli maður, sem að sögn danskra fjölmiðla er áberandi í glæpagengi í Kaupmannahöfn.
Samkvæmt fjölmiðlinum DR var grunaði maðurinn framseldur frá Líbanon í tengslum við annað mál sem snerist um tvöfalt morð.
„PET og ákæruvaldið telja að viðkomandi sé leiðtogi í bönnuðu gengi og hafi tengsl við Hamas,“ sagði í yfirlýsingu frá PET. Danska leyniþjónustan hefur ítrekað bent á að átökin í Miðausturlöndum hafi „útbreiðsluáhrif“ á „ógnarlandslagið“ í Skandinavíu.
