Mannréttindasamtökin Rabbis for Human Rights kallar hóp gyðinga sem réðst á mosku í þorpinu At-Tawani á Suður-Hebron-hæðum á hernumda Vesturbakkanum á dögunum og valdið þar miklu tjóni, hryðjuverkamenn.

Í Facebook-færslu samtakanna segir að um 30 menn frá ólöglegri landnemabyggð hafi brotið rúður í moskunni, málað á hana veggjakrot með orðinu „Hefnd“ og Davíðsstjörnu, auk þess að kveikja í moskunni og bílum og íbúðarhúsum í nágrenninu.

Samtökin lýsa árásarmönnunum sem „gyðingahryðjuverkamönnum“ og segja að eftir að þau, samtökin, hafi séð skemmdirnar hafi þau haft samband við sveitarstjórnina og boðist til að aðstoða við uppbyggingarstarf.

Fimm dögum síðar komu sjálfboðaliðar á þeirra vegum á vettvang.

„Við komum með rútu fulla af sjálfboðaliðum, gyðingum, múslimum og kristnum, sem unnu saman að því að fjarlægja veggjakrot, mála hurðirnar á ný og hreinsa svæðið,“ segir í færslunni.

Samtökin segja árásina hafa fengið nokkra fjölmiðlaumfjöllun en telja að uppbyggingarstarfið eigi einnig skilið athygli.

„Árásin komst í fréttirnar og það ætti enduruppbyggingin líka að gera. Deilið þessu svo fleiri viti af þeirri vinnu sem fer fram á vettvangi,“ skrifa Rabbis for Human Rights.