Maður var handtekinn eftir að eldur kviknaði á hóteli í miðborg Reykjavíkur í nótt. Mikið viðbragð lögreglu og slökkviliðs var vegna brunans.

Þetta kemur fram í dagbók lögreglunnar á höfuðborgarsvæðinu. Tilkynning um eldinn barst lögreglu og voru viðbragðsaðilar sendir á vettvang. Skömmu síðar var maður handtekinn vegna málsins, sem nú er til rannsóknar hjá lögreglu.

Tvær líkamsárásir í miðborginni eru einnig til rannsóknar eftir nóttina. Hvorug árásin var talin meiriháttar að sögn lögreglu.

Þá hafði lögregla afskipti af nokkrum ökumönnum. Einn var stöðvaður vegna gruns um akstur undir áhrifum vímuefna og annar vegna gruns um ölvunarakstur. Sá síðarnefndi var látinn laus að lokinni sýnatöku. Þá var ökumaður stöðvaður sem grunaður er um að hafa ekið sviptur ökuréttindum.

Lögregla sinnti jafnframt útkalli vegna ölvaðs manns sem var til vandræða á hóteli. Maðurinn neitaði að fara að fyrirmælum lögreglu og var kærður fyrir brot á lögreglusamþykkt.