Öfgahægrimenn reyndu að stöðva flutning hjálpargagna til Gaza. Mjög erfitt er að nálgast hjálpargögnin.

Gaza Humanitarian Foundation hefur birt ljósmyndir af heimamönnum sem fengu hjálpargögn frá dreifingarmiðstöð á svæði sem er undir stjórn Ísraelsmanna.

En mjög erfitt er fyrir fólk að nálgast hjálpargögnin frá nýlega stofnuðum dreifingarmiðstöðvum í suðurhluta Gaza.

Margir Palestínumenn efast um hlutleysi samtakanna og gagnrýna að hjálpargögn séu notuð sem pólitískt tæki til að hafa stjórn á för fólks.

Reyndin er sú að aðeins þeir sem færa sig suður fá hjálp, en þeir sem dvelja í mið- og norðurhluta Gaza fá hana ekki.

Fólk sem ákveður að fara suður þarf að leggja í langa og hættulega ferð. Margir óttast einnig að verða fluttir varanlega og að þeir fái aldrei að snúa aftur heim.

Reyndu að stöðva dreifingu hjálpargagna

Þá safnaðist hópur öfgahægrimanna saman við höfnina í Ashdod í Ísrael, um 30 kílómetrum frá Gazaströndinni, í þeim tilgangi að hindra flutning hjálpargagna til svæðisins.

Samkvæmt upptökum sem birtar hafa verið í ísraelskum fjölmiðlum og á samfélagsmiðlum má sjá mótmælendur standa fyrir framan flutningabíla þegar þeir óku út úr hafnarhliðinu. Lögregla reyndi að fjarlægja mótmælendur svo flutningabílarnir komist sína leið.