Guðrún Karls Helgudóttir, biskup Íslands, hvetur presta og djákna á Íslandi til að hringja kirkjuklukkum landsins á fimmtudaginn 7. ágúst klukkan 13:00 í sjö til fimmtán mínútur til stuðnings fólks sem býr á Gaza.

„Fréttir berast dag hvern um ómannúðlegt ástand á Gasa þar sem yfir 60.000 manns hafa látið lífið og staðan versnar dag frá degi. Þetta er manngerður hryllingur þar sem engum er þyrmt og jafnvel komið í veg fyrir mannúðaraðstoð,“ skrifar biskupinn í bréfi til presta og djákna.

„Kristin kirkja getur ekki staðið hljóð hjá og því hvetja biskuparnir kirkjunnar þjóna til þess að hringja kirkjuklukkum sem flestra kirkna á Íslandi samtímis. Klukkum dómkirknanna þriggja, Dómkirkjunnar í Reykjavík, Skálholtsdómkirkju og Hóladómkirkju verður hringt og von okkar er að sem flestar kirkjur taki þátt. Klukknaköllin verða með því ákall um frið og til þess að vekja athygli á þeim sem líða á Gasa. Þá hvetjum við til þess að fólk tendri ljós, biðji fyrir þeim sem þjást á Gasa og fyrir friði.“

Samkvæmt Þjóðkirkjunni eiga biskupar norsku kirkjunnar frumkvæðið að þessu og verður klukkum hring samtímis á Íslandi, í Noregi, Svíþjóð, Finnlandi og hjá systurkirkjum þeirra í Jerúsalem.