Kristinn Hrafnsson, fjölmiðlamaður, birti athyglisverða greiningu á samfélagsmiðlum þar sem hann skoðaði viðbrögð alþjóðasamfélagsins við viðtali Piers Morgan við Íslendinginn Samúel Guðmundsson á YouTube. Kristinn notaði gervigreind til þess að taka saman yfir fimm þúsund athugasemdir og eru niðurstöðurnar afgerandi.

„Tölfræðilega sigraði Samúel með yfirburðum, 91% studdu hann með skýrum hætti,“ skrifar Kristinn og vísar til þess að hann hafi látið greina 5.700 athugasemdir undir þættinum, sem þá höfðu fengið um 50 þúsund „læk“.

Ókeypis landkynning og áhugi á ferðalögum

Í færslunni birtir Kristinn samantekt gervigreindarinnar, en þar kemur fram að framkoma Samúels hafi varpað „óvenju jákvæðu ljósi á Ísland“ og að áhorfendur hafi tengt hana við húmor og virðingu fyrir landinu.

Greiningin sýnir að viðtalið virðist hafa virkað sem öflug landkynning. Vel á annað hundrað athugasemdir fjölluðu um áhuga á að heimsækja Ísland, ferðast þangað eða jafnvel flytja. Samkvæmt Kristni sagði vinsælasta athugasemdin undir myndbandinu einfaldlega: „Samúel var rétt í þessu að stóruka ferðamannastrauminn til Íslands.“

Skorar á Íslandsstofu að grípa inn í

Samúel þurfti að taka sér leyfi frá störfum til þess að undirbúa sig fyrir þáttinn, og telur Kristinn að það eigi að umbuna honum fyrir vikið. Hann lýkur færslu sinni á afgerandi áskorun til opinberra aðila:

„Mér sýnist einboðið að Íslandsstofa bæti honum það vinnutap – og gott betur.“