Lögreglan á höfuðborgarsvæðinu skráði alls 50 mál á tímabilinu frá klukkan 17:00 síðdegis til 05:00 í nótt.

Meðal verkefna lögreglu var tilkynning um betlara sem hafði angrað viðskiptavini fyrirtækis í Laugardalnum. Þá var einn einstaklingur handtekinn vegna gruns um þjófnað og vistaður í fangaklefa.

Nokkur mál tengdust akstri undir áhrifum áfengis eða fíkniefna. Einn ökumaður var handtekinn grunaður um ölvun við akstur og látinn laus að lokinni sýnatöku. Annar var handtekinn grunaður um akstur undir áhrifum ávana- og fíkniefna, auk skjalafals og fleiri brota, og fluttur á lögreglustöð.

Tveir ökumenn til viðbótar voru stöðvaðir grunaðir um akstur undir áhrifum fíkniefna. Annar þeirra var látinn laus að lokinni sýnatöku en hinn var einnig grunaður um vörslu fíkniefna og var fluttur á lögreglustöð.

Lögreglan handtók einnig einstakling sem grunaður er um ólöglega dvöl hér á landi og ólöglega atvinnustarfsemi. Sá var fluttur á lögreglustöð til frekari rannsóknar.

Þá var einn ökumaður kærður fyrir akstur án gildra ökuréttinda.

Einnig barst lögreglu tilkynning um tónlistarhávaða í Árbæ. Samkvæmt dagbók lögreglu lofaði húsráðandi að lækka hljóðstyrkinn.