Tveir aðilar voru vistaðir í fangageymslu þegar þetta var ritað, samkvæmt dagbók lögreglu. Gærkvöldið og nótti einkenndist af fjölbreyttum verkefnum, meðal annars handtökum, umferðarslysi og fjölda hraðakstursbrota.

Í Laugardalnum var ökumaður handtekinn grunaður um akstur undir áhrifum fíkniefna auk þjófnaðar. Þá var annar aðili handtekinn í miðborginni vegna gruns um íkveikju. Í Reykjavík var ökumaður einnig handtekinn fyrir fíkniefnaakstur og akstur sviptur ökurétti.

Alvarlegt umferðarslys varð í Reykjavík þegar ekið var á gangandi vegfaranda. Ekki liggja fyrir frekari upplýsingar um ástand viðkomandi.

Lögregla hafði einnig afskipti af fjölda ökumanna vegna hraðaksturs. Í Laugardalnum voru ökumenn stöðvaðir á allt að 105 km/klst. þar sem hámarkshraði er 60 km/klst. Sambærileg brot komu upp í Árbænum, þar sem hraði mældist allt að 124 km/klst. á 80 km/klst. svæði.

Í Hafnarfirði var ökumaður sektaður fyrir akstur sviptur ökurétti, og í Kópavogi var ökumaður kærður fyrir að aka án gildra ökuréttinda.

Lögregla sinnti einnig útköllum vegna óspekta. Óstýrilátum aðila var vísað út Hafnarfirði í hverfi 220, og ölvuðum einstaklingum var vísað á brott úr verslunarkjarna í Reykjavík. Þá barst tilkynning um ölvaðan aðila sem neitaði að yfirgefa strætisvagn á endastöð.