Rithöfundurinn og fjölmiðlamaðurinn Illugi Jökulsson telur að Íslendingar eigi tafarlaust að kanna grundvöll fyrir eigin aðildarsamningi við Evrópusambandið (ESB). Hann óttast að breytt heimsmynd og vaxandi yfirgangur Bandaríkjanna muni knýja nágrannaþjóðir okkar til að leita nær ESB, sem gæti skilið Ísland eftir í algjörri einangrun.

Þetta kemur fram í færslu á Illuga þar sem hann lýsir yfir þungum áhyggjum af þróun alþjóðamála.

Treysta ekki lengur Bandaríkjunum

Illugi bendir á að framkoma Bandaríkjanna gagnvart nágrannaþjóðum okkar sé farin að breyta pólitísku landslagi á Norðurlöndum og í Norður-Ameríku. „Hótanir og yfirgangur Bandaríkjanna í garð Grænlands eru eitt. Kröfur Bandaríkjanna um að þau fái að ráða innlandsmálum í Kanada eru annað,“ skrifar Illugi og fullyrðir að Atlantshafsbandalagið (NATÓ) hafi veikst stórlega. „Engin þjóð getur lengur treyst Bandaríkjunum.“

Hann bætir því við að þetta ástand muni ekki breytast að neinu ráði þó að Donald Trump láti á endanum af embætti.

Spáir hraðferð Noregs inn í ESB

Að mati Illuga eru stjórnvöld í Kanada og Noregi meðvituð um þessa nýju stöðu. Kanadamenn vilji nú ná miklu nánari tengslum við Evrópusambandið og sömu sögu sé að segja af Norðmönnum, sem sjái fram á að geta ekki treyst á Bandaríkin til að verja sig gegn Rússum og Kínverjum.

„Það er alveg deginum ljósara að innan örfárra missera mun hefjast í Noregi sterk hreyfing fyrir því að ganga í Evrópusambandið,“ skrifar Illugi og telur að Norðmenn gætu farið „sannkallaða hraðferð“ inn í sambandið.

EES-samningurinn gæti fallið úr gildi

Verði sú sviðsmynd að veruleika að Noregur gangi í ESB, telur Illugi að staða Íslands verði mjög veik og að Evrópska efnahagssvæðið (EES) muni líða undir lok.

„Þá yrðum við eins og krækiber í helvíti, EES-samningurinn félli úr gildi og við yrðum að lúpast inn í Evrópusambandið á frakkalöfum Norðmanna,“ segir Illugi.

Hann lýkur færslu sinni á þeirri spurningu hvort ekki sé skynsamlegra fyrir Íslendinga að grípa frumkvæðið á meðan staða landsins er sterk: „Væri ekki miklu skynsamlegra — nú þegar við erum í mun sterkari stöðu — að kanna hvað gæti komið út úr okkar eigin aðildarsamningi?“