Ingvar Þóroddsson, þingmaður Viðreisnar, hefur tilkynnt á samfélagsmiðlum að hann sé farinn í leyfi frá störfum til að fara í meðferð á Vogi vegna drykkjuvanda.

„Seinasta haust horfðist ég í fyrsta skiptið í augu við það að ég og áfengi ættum ekki samleið. Ég sá að ég ætti við drykkjuvanda og stríða og þyrfti að hætta. Ég tók mikilvæg en á köflum erfið skref í rétta átt og tókst nokkuð vel að snúa blaðinu við þó ég segi sjálfur frá. Svo skall á með þingkosningum og ég var kjörinn þar inn, sem ég hef enga trú á að hefði getað gerst hefði ég ekki orðið edrú fyrr um árið,“ skrifar Ingvar á Facebook.

Hann segir að því miður hafi orðið bakslag í þeim efnum og hann hafi gert mistök sem hann geti ekki kennt neinum sem sjálfum sér um. „Ég er miður mín gagnvart vinum mínum og fjölskyldu sem ég hef valdið vonbrigðum, sem og samstarfsfélögum á þinginu og í Viðreisn. Ég ætla mér að snúa blaðinu við svo ég geti staðið almennilega undir því sem ég lofaði kjósendum mínum að vera, öflugur fulltrúi á þingi.“

Hann segir í framhaldinu að hann muni fara á Vog í dag til að takast á við veikindin svo honum geti liðið vel með sjálfan sig og lífið. Hann segir í lokin að Heiða Ingimarsdóttir muni taka hans stað meðan hann er í leyfi og er viss um að hún muni standa sig með glæsibrag.