Íslensk kona hefur verið sakfelld fyrir að ráðast á lögreglumann í Héraðsdómi Reykjavíkur.

Hún var ákærð fyrir brot gegn valdstjórninni, með því að hafa að morgni sunnudagsins 5. júní 2022, á þáverandi heimili sínu að í Reykjavík, veist með ofbeldi að lögreglumanni, sem var við skyldustörf, með því að slá peysu í andlit hans og sparka einu sinni með hæl sínum í sköflung hans með þeim afleiðingum að gleraugu lögreglumannsins urðu fyrir tjóni og hann hlaut eymsl á sköflungi.

Kona mætti ekki þrátt fyrir löglega boðun og var það tekið sem játning hennar en einnig náðist hún á upptöku í búkmyndavélum lögreglu.

Konan hafði ekki verið fundin sek um refsiverðan verknað sem hafði þýðingu við refsingu hennar í þetta skipti.

„Við ákvörðun refsingar er til þess að líta að langt er um liðið síðan atvik málsins áttu sér stað. Af gögnum málsins verður ráðið að rannsókn þess hafi lokið og málið verið sent héraðssaksóknara til meðferðar um mitt ár 2022. Hefur sá dráttur, sem ákærðu verður ekki kennt um, ekki verið útskýrður með neinum hætti,“ segir meðal annars í dómnum

Var þá tekin ákvörðun um að fresta refsingu hennar í tvö ár haldi hún skilorði.