Héraðsdómur Reykjavíkur hefur dæmt íslenskan karlmann í átta mánaða skilorðsbundið fangelsi fyrir tilraun til ráns sem framið var í Lyfju í Reykjavík í nóvember 2023.

Samkvæmt dómnum fór maðurinn inn í apótekið vopnaður tveimur hnífum og ógnaði starfsmanni með öðrum þeirra. Hann krafðist þess að fá afhent lyfin Oxycontin og Sobril, en lögregla handtók hann á vettvangi áður en honum tókst að komast yfir lyfin.

Maðurinn játaði brotið.

Við ákvörðun refsingar var litið til umfangsmikils sakaferils hans, en hann hafði áður hlotið dóma meðal annars fyrir rán, þjófnað, líkamsárásir og brot gegn vopnalögum. Brotið var jafnframt talið ítrekað.

Dómurinn tók þó einnig mið af því að maðurinn hefði játað brotið og sýnt verulegar framfarir í eigin málum frá því það var framið. Hann hefur lokið meðferð vegna fíknivanda, sækir AA-fundi og dvelur nú á meðferðarúrræði. Þá var bent á að óeðlilega langur dráttur hefði orðið á meðferð málsins, en meira en tvö og hálft ár liðu frá brotinu þar til ákæra var gefin út.

Refsingin var því skilorðsbundin til þriggja ára.