Greta Thunberg sigldi frá Sikiley þann 1. júní ásamt ellefu öðrum aðgerðarsinnum í átt að Gaza með neyðaraðstoð fyrir svæðið, sem hefur orðið fyrir miklum skaða vegna gengdarlausra árása Ísraelshers. Í dag skipaði varnarmálaráðherra Ísraels, Israel Katz, hernum að stöðva seglbátinn og „grípa til allra nauðsynlegra aðgerða“.
„Ísrael vill ekki gera Gretu að píslarvotti“
Ferðin og yfirlýsingar í tengslum við hana hafa fengið mikla athygli í fjölmiðlum. Alexander Atarodi, sérfræðingur í Mið-Austurlöndum telur þó að Ísrael reyni að draga úr mikilvægi þátttöku Gretu í málinu.
„Greta er alþjóðleg fyrirmynd. Að hún taki svona þátt í málinu gæti kallað á mikinn stuðning við málstað Gasa.“
Anders Persson, stjórnmálafræðingur með sérhæfingu í málefnum Miðausturlanda, tekur í sama streng og bendir á áhrifamátt Gretu. Hann telur að Ísrael vilji nálgast málið af varfærni.
„Þeir vilja ekki gera Gretu að píslarvotti. Ísrael vill leysa þetta án þess að vekja of mikla athygli“, segir hann.
Talsmaður þýska arms Freedom Flotilla Coalition, samtakanna sem standa að ferðinni, segir að báturinn muni halda áfram þrátt fyrir hótanir Ísraels.
„Átök yfirvofandi“
Anders Persson segir að Ísrael hafi í 15 ár haft stefnu um að stöðva báta á vegum Freedom Flotilla Coalition. Nú þegar báturinn nálgast strendur Gaza, telur hann það sífellt brýnna fyrir Ísrael að stöðva ferðina og koma í veg fyrir að neyðaraðstoðin komist til lands.
„Það er engin spurning að átök eru yfirvofandi“, segir hann.
Hann bendir á að bátar samtakanna hafi áður orðið fyrir árásum, jafnvel með drónum. Hins vegar telur hann líklegra að sérsveitir verði sendar um borð til að stöðva ferðina eða að báturinn verði skemmdur á einhvern hátt, til að forðast of sterkar viðbragðsbylgjur í alþjóðasamfélaginu.
Hvernig ímynd Ísraels gæti skaðast
Alexander Atarodi telur að ímynd Ísraels í alþjóðasamfélaginu gæti orðið fyrir enn frekari skaða ef seglbáturinn kemst til Gasa og varpar ljósi á aðstæður Palestínumanna þar.
„Ísrael reynir nú að takmarka skaðann (e. „damage control“). Ef hún kemst alla leið gæti það haft hörmulegar afleiðingar fyrir Ísrael.“
Að sögn Atarodi vinnur Ísrael mjög markvisst að því að hafa stjórn á ímynd landsins og upplýsingum sem berast um það út á við.
„Þegar ungt fólk fer að hafa neikvæða sýn á Ísrael, er það slæmt fyrir framtíð landsins. Þetta fólk gæti verið í áhrifastöðum eftir tíu ár.“
Hann bendir jafnframt á að vaxandi mótmæli, bæði innanlands og utan, bendi til þess að ímynd Ísraels sé nú þegar að versna verulega.
Sænski fréttamiðillinn SVT fjallaði um málið.
