Stærstu skipulögðu glæpasamtök Japans, Yamaguchi-gumi, hafa afhent yfirvöldum skriflega yfirlýsingu þess efnis að þau ætli að binda endi á stríð sín við klofningshópa, samkvæmt upplýsingum frá lögreglunni í Japan í dag
Yamaguchi-gumi hefur háð blóðug stríð við önnur japönsk glæpasamtök sem stofnuð voru af fyrrverandi meðlimum þess eftir klofning árið 2015. Yfirmenn samtakanna afhentu lögreglu í Hyogo-héraði yfirlýsingu á mánudag þar sem þeir hétu því „að binda endi á öll innbyrðis átök“ og „valda engum vandræðum“, að sögn lögregluembættismanns sem ræddi við AFP.
Yfirvöld hafa haft fjölmörg glæpasamtök undir náinni vöktun frá árinu 2020 vegna vaxandi ofbeldis, sem hefur takmarkað verulega starfsemi þeirra, meðal annars notkun skrifstofa þeirra á ákveðnum svæðum.
Yfirlýsing Yamaguchi-gumi, sem var lögð fram í Hyogo í vesturhluta Japans, gæti samkvæmt heimildum japanskra fjölmiðla verið tilraun til að fá afléttingu á þessum takmörkunum. Óljóst er hvað klofningshóparnir ætla sér, að sögn lögreglunnar í Hyogo. Rannsakendur fylgjast grannt með gangi mála, þar sem yfirlýsing Yamaguchi-gumi gæti verið einhliða.
Ólíkt ítölsku eða kínversku mafíunum hefur sú japanska lengi verið á gráu svæði í japönsku samfélagi. Samtökin eru ekki ólögleg og hafa hver fyrir sig höfuðstöðvar sínar opinberar og í augsýn lögreglu.
Japanska mafían spratt upp úr ringulreiðinni í kjölfar síðari heimsstyrjaldar og urðu að risastórum glæpasamtökum.Hún tekur þátt í fjölbreyttri starfsemi, allt frá eiturlyfjum og vændi til verndargjalda og fjármálabrota.
Á síðustu áratugum hafa harðari lög gegn glæpagengjum, minnkandi umburðarlyndi í samfélaginu og veik efnahagsstaða leitt til stöðugrar fækkunar meðlima.
Fjöldi meðlima glæpasamtaka í Japan náði sögulegu lágmarki árið 2024, þegar þeir voru aðeins 18.800 talsins og fór í fyrsta sinn undir 20.000 manns, samkvæmt tölum lögreglu sem birtar voru í þessum mánuði.
Þrátt fyrir það eru samtökin enn talin ógn við samfélagið þar sem þau halda áfram starfsemi með lægri sýnileika, að sögn lögreglunnar í nýlegri skýrslu.
Húðflúr eru enn tengd japönsku mafíunni og öðrum „andfélagslegum“ öflum, þó viðhorf séu smám saman að breytast. Fólki með húðflúr er enn oft meinað um aðgang að stöðum eins og sundlaugum eða heitum böðum („onsen“), og ferðamenn með húðflúr geta lent í vandræðum vegna þessara reglna.
