Í nýrri könnun Maskínu kemur fram að Kristrún Frostadóttir forsætisráðherra sé talin hafa staðið sig best allra ráðherra á yfirstandandi kjörtímabili. Athygli vekur að Inga Sæland mennta- og barnamálaráðherra er bæði nefnd sem sú sem hafi staðið sig næstbest og jafnframt verst.

Könnunin var framkvæmd meðal 969 svarenda í Þjóðargátt Maskínu dagana 25. til 31. mars. Þátttakendur voru spurðir annars vegar hvaða ráðherra þeir teldu hafa staðið sig best og hins vegar hver hefði staðið sig verst á kjörtímabilinu.

Niðurstöðurnar sýna að 21,1% svarenda telja Kristrúnu hafa staðið sig best. Þar á eftir kemur Inga með 10,5%, og skammt undan er Þorbjörg Sigríður Gunnlaugsdóttir dómsmálaráðherra með 10,3%.

Einnig er greint sérstaklega frá því hvað kjósendum flokkanna sem eru í minnihluta finnst um núverandi ráðherra. Logi Einarsson menntamálaráðherra hefur staðið sig best að mati Framsóknarmanna, Jóhann Páll Jóhannesson umhverfis-, orku- og loftslagsráðherra er í mestu uppáhaldi hjá Sjálfstæðismönnum ásamt Þorbjörgu en hún er einnig í fyrsta sæti hjá Miðflokksmönnum.