Leikarinn Peter Greene, sem var þekktur fyrir að leika illmenni í kvikmyndum á borð við Pulp Fiction og The Mask, er látinn, sextugur að aldri. Greene fannst látinn í íbúð sinni á Manhattan í gær og staðfesti umboðsmaður hans, Gregg Edwards, andlátið í samtali við Deadline. Dánarorsök liggur ekki fyrir að svo stöddu en hann hafði á árum áður glímt við heróin og kókaínfíkn.
Greene fæddist 8. október 1965 í Montclair í New Jersey. Hann steig sín fyrstu skref í sjónvarpi í einum þætti af skammlífri glæpaþáttaröð NBC, Hardball, árið 1990. Kvikmyndafrumraun sína átti hann tveimur árum síðar í myndinni Laws of Gravity, þar sem hann lék á móti Edie Falco.
Ferill hans tók fljótt kipp. Árið 1993 lék Greene aðalhlutverk í myndinni Clean, Shaven, sem var sýnd á kvikmyndahátíðinni í Cannes árið 1994. Sama ár kom hann fram í tveimur stórmyndum: hann lék illmennið Zed í Pulp Fiction eftir Quentin Tarantino, sem hlaut Gullpálmann í Cannes, og aðalandstæðing Jim Carrey, Dorian Tyrell, í The Mask.
Greene hélt áfram að vinna jafnt og þétt í kvikmyndum og sjónvarpi. Hann lék í myndum á borð við Kiss & Tell, Blue Streak, End Game og The Bounty Hunter og átti eftirminnileg hlutverk í The Usual Suspects og Training Day. Í sjónvarpi var hann fastaleikari í þáttaröðinni The Black Donnellys á NBC og fór með endurtekin hlutverk í Life on Mars á ABC og Chicago P.D. á NBC. Hann kom síðast fram í þætti úr forsöguþáttaröðinni The Continental, sem byggir á John Wick-myndunum.
„Hann var einn besti karakterleikari heims,“ sagði Edwards og greindi jafnframt frá því að Greene ætti tvö verkefni fram undan, kvikmyndina Mascots með Mickey Rourke og heimildarmynd sem hann var að lesa inn á, From the American People: The Withdrawal of USAID, ásamt Jason Alexander og Kathleen Turner.
„Hann var mikill áhugamaður um að varpa ljósi á þau dauðsföll sem orðið hafa víðs vegar um heiminn í kjölfar þess að Bandaríkin drógu úr starfsemi USAID,“ sagði Edwards. „Hann var góður vinur sem hefði gefið þér skyrtuna af bakinu á sér. Hann var elskaður og hans verður sárt saknað.“
Í nýlegu myndskeiði af Peter, sem birt var á YouTbue, mátti sjá að hann var í slæmu ásigkomulagi af einhverjum ástæðum.
Peter Greene lætur eftir sig bróður og systur, sem hefur verið tilkynnt um andlátið.
