Umboðsmaður Alþingis hefur lokið athugun á aðgengi fatlaðs fólks að utankjörfundaratkvæðagreiðslu á vegum sýslumannsins á höfuðborgarsvæðinu eftir að úrbætur voru gerðar á húsnæði embættisins í Kópavogi.

Athugunin hófst í kjölfar ábendingar um að aðgengi að húsnæðinu við Hlíðasmára væri ófullnægjandi við sveitarstjórnarkosningarnar í maí. Meðal annars voru gerðar athugasemdir við rampa sem komið hafði verið fyrir fyrir notendur hjólastóla. Þeir voru sagðir skorta nauðsynlegar bríkur og snúningsflötur þeirra talinn of lítill.

Sýslumaður upplýsti að leitað hefði verið ráðgjafar ÖBÍ réttindasamtaka við undirbúning húsnæðisins. Síðar hefði þó komið í ljós að ramparnir uppfylltu ekki að öllu leyti ákvæði byggingarreglugerðar. Engin vandræði eða óhöpp hefðu þó komið upp vegna aðgengisins.

Fyrir þjóðaratkvæðagreiðsluna 29. ágúst var ráðist í úrbætur. Notendum hjólastóla og fólki sem á erfitt með gang var meðal annars gert kleift að nota starfsmannainngang á jarðhæð. Rampur var jafnframt lagfærður og palli bætt við til að auðvelda aðgengi.

Sýslumaður sagði að aðgengið uppfyllti nú að öllu leyti kröfur byggingarreglugerðar.

Umboðsmaður taldi því ekki ástæðu til frekari athugunar en áréttaði mikilvægi þess að stjórnvöld tækju ávallt mið af ólíkum þörfum fólks, sérstaklega fatlaðra, við framkvæmd verkefna sinna.