Karlmaður af albönskum uppruna hefur verið dæmdur í sex mánaða skilorðsbundið fangelsi fyrir umfangsmikla kannabisræktun í Reykhólahreppi. Dómur féll í Héraðsdómi Vestfjarða í vikunni.
Maðurinn, Aldorino Bregu, var ákærður fyrir fíkniefnalagabrot með því að hafa 10. ágúst síðastliðinn haft í vörslum sínum 260 kannabisplöntur í sölu- og dreifingarskyni. Plönturnar vógu samtals 126,4 kíló og höfðu verið ræktaðar um nokkurt skeið í húsnæði í Reykhólahreppi.
Lögregla fann plönturnar við leit í húsinu. Þar var jafnframt lagt hald á umfangsmikinn búnað sem notaður var við ræktunina, meðal annars 62 gróðurhúsalampa, 46 spenna, loftblásara, viftur, loftsíur, 356 blómapotta og 310 stangir í blómapotta.
Bregu játaði brot sín skýlaust fyrir dómi og hafði ekki áður gerst sekur um refsivert brot svo kunnugt væri.
Refsing hans var ákveðin sex mánaða fangelsi, en fullnustu hennar frestað í tvö ár haldi hann almennt skilorð.
Kannabisplönturnar og ræktunarbúnaðurinn voru gerð upptæk. Bregu var jafnframt gert að greiða rúmlega 1,1 milljón króna í málsvarnarþóknun og annan sakarkostnað.
