Katie Holmes heiðraði fyrrverandi meðleikara sinn úr þáttunum Dawson's Creek, James Van Der Beek, með hjartnæmu handskrifuðu bréfi eftir andlát hans í gær.
Í færslu sem hún birti á Instagram rifjar Holmes upp að hún hafi fundið fyrir öryggi á tökustaðnum með honum og treyst sér til að vera hún sjálf. Hún segir þau eiga ótal minningar saman, fullar af „hlátri, samtölum um lífið, James Taylor-lögum“ og „ævintýrum einstakrar æsku“.
Holmes hrósar einnig mannkostum hans og nefnir sérstaklega „samkennd, hugrekki, óeigingirni og styrk“. Hún beinir orðum sínum að lokum að eiginkonu hans, Kimberly, og sex börnum þeirra og skrifar:
„Við erum alltaf hér fyrir ykkur. Og munum ávallt vera til staðar til að umlykja ykkur ást og samúð.“
Holmes og Van Der Beek léku saman í Dawson’s Creek á árunum 1998 til 2003. Van Der Beek fór þar með hlutverk Dawson Leery, upprennandi kvikmyndagerðarmanns, en Holmes lék vinkonu hans, Joey Potter.
Holmes er aðeins ein af fjölmörgum þekktum einstaklingum sem hafa minnst Van Der Beek eftir fráfall hans. Meðal þeirra eru fyrrverandi meðleikarar hans Busy Philipps og Kerr Smith, auk leikkvenna á borð við Söruh Michelle Gellar, Jennifer Garner og Reese Witherspoon, sem allar heiðruðu minningu hans og feril.
Fréttamiðillinn TMZ greindi fyrst frá andlátinu. Van Der Beek lést í gærmorgun og fjölskylda hans staðfesti skömmu síðar að hann hefði látist friðsamlega. Hann greindist með krabbamein í ristli á þriðja stigi um mitt ár 2023 og greindi opinberlega frá veikindunum í nóvember 2024.
Leikarinn, sem einnig var þekktur fyrir hlutverk sitt í myndinni Varsity Blues, lætur eftir sig eiginkonu sína og sex ung börn. Vinir fjölskyldunnar hafa stofnað öfluga söfnun á GoFundMe til stuðnings Kimberly, þar sem dýr krabbameinsmeðferðin hafði tæmt fjárhag fjölskyldunnar. Söfnunin fór yfir eina milljón dollara á örfáum klukkustundum eftir að andlátið var tilkynnt og heldur áfram að vaxa.
James Van Der Beek var 48 ára að aldri.
