Töluverð verkefni komu inn á borð Lögreglan á höfuðborgarsvæðinu í nótt og í gær, þar sem meðal annars var gripið til handtaka vegna fíkniefnamála, þjófnaðar og líkamsárása auk þess sem nokkrir ökumenn voru stöðvaðir vegna umferðarlagabrota.
Karlmaður var handtekinn í miðborginni fyrir brot á lögreglusamþykkt. Eftir viðræður við varðstjóra var honum hins vegar sleppt. Síðar sama dag var annar maður handtekinn í sama hverfi grunaður um fíkniefnalagabrot, peningaþvætti og brot á reglum um dvalarleyfi. Hann var vistaður í fangageymslu vegna rannsóknar málsins.
Nokkur umferðarlagabrot komu einnig til kasta lögreglu. Ökumaður var stöðvaður í hverfi 108 eftir að hafa ekið á 110 km/klst þar sem leyfður hámarkshraði er 80 km/klst. Málið var afgreitt með sekt. Þá var annar ökumaður stöðvaður eftir að hafa ekið gegn rauðu ljósi og má hann einnig eiga von á sekt.
Í Hafnarfirði voru tveir menn handteknir vegna þjófnaðar úr verslun. Málið var afgreitt á vettvangi. Síðar barst tilkynning um líkamsárás í sama hverfi þar sem um minniháttar meiðsli var að ræða og málið var einnig afgreitt á staðnum.
Lögregla hafði afskipti af nokkrum ökumönnum vegna gruns um akstur undir áhrifum fíkniefna. Í Hafnarfirði var ökumaður stöðvaður og látinn laus að lokinni blóðsýnatöku. Sambærileg mál komu upp í Kópavogi, Breiðholti og Grafarvogi, þar sem ökumenn voru stöðvaðir vegna gruns um fíkniefnaakstur. Í tveimur tilvikum kom í ljós að ökumennirnir höfðu jafnframt verið sviptir ökuréttindum. Þeir voru allir látnir lausir að lokinni blóðsýnatöku.
Í Kópavogi var einnig stöðvaður ökumaður sem reyndist sviptur ökuréttindum og var málið afgreitt með sekt.
Þá var kona handtekin í Grafarvogi, grunuð um líkamsárás. Hún var í annarlegu ástandi og vistuð í fangaklefa vegna rannsóknar málsins.
