Lögreglan á höfuðborgarsvæðinu hafði í ýmsu að snúast í gærkvöldi og nótt. Nokkur heimilisofbeldismál komu til kasta lögreglu auk þess sem afskipti voru höfð af fjölda ökumanna vegna gruns um umferðarlagabrot.

Einn var handtekinn vegna rannsóknar á heimilisofbeldi og tvö önnur heimilisofbeldismál voru skráð til rannsóknar.

Þá var kona vistuð í fangaklefa eftir að hún neitaði að greiða reikning á veitingastað.

Nokkur mál tengdust umferðinni. Lögregla hafði afskipti af ökumanni sem notaði ekki öryggisbelti og annar ökumaður var handtekinn vegna gruns um akstur undir áhrifum fíkniefna. Sá reyndist jafnframt vera án ökuréttinda.

Afskipti voru einnig höfð af ölvuðum ökumanni og síðar var annar ökumaður handtekinn vegna gruns um akstur undir áhrifum áfengis.

Þá stöðvaði lögregla ökumann sem hafði verið sviptur ökuréttindum. Annar var á bifreið sem var ekki með skráningarmerki og sá þriðji hafði ekki endurnýjað ökuréttindi sín.

Lögregla gerði jafnframt athugasemd við aksturslag ungmennis á rafhjóli og voru foreldrar þess látnir vita af málinu.

Að lokum þurfti lögregla að hafa afskipti af hópi ungmenna sem var til vandræða. Samkvæmt dagbók lögreglu höfðu ungmennin meðal annars kastað grjóti.