Tveir einstaklingar voru handteknir fyrir líkamsárás á höfuðborgarsvæðinu í gærkvöldi og nótt. Þá urðu talsverðar skemmdir á göngubrú og vörubifreið eftir að kranabíll skall á brú.

Samkvæmt dagbók lögreglu átti fyrri líkamsárásin sér stað í Mosfellsbæ þar sem einn var handtekinn og fluttur á lögreglustöð. Skömmu síðar var annar maður handtekinn í Kópavogi, en hann er grunaður um líkamsárás og eignaspjöll og var hann vistaður í fangaklefa.

Eftirlýstur maður og garðaþjófur gripnir

Lögregla hafði einnig afskipti af einstaklingi í hverfi 108 í Reykjavík. Við athugun reyndist viðkomandi vera eftirlýstur fyrir fjölda brota og gistir hann nú fangaklefa. Þá var annar einstaklingur handtekinn í Hafnarfirði eftir að hafa verið staðinn að verki við að stela verðmætum úr görðum íbúa. Í miðborginni þurfti lögreglan að hafa afskipti að pari í annarlegu ástandi vegna áfengis- og fíkniefnaneyslu og var þeim vísað á brott af svæðinu.

Gleymdi að setja niður kranann

Talsvert eignatjón varð þegar vörubifreið með krana var ekið utan í göngubrú. Svo virðist sem ökumaðurinn hafi gleymt að setja kranann niður áður en lagt var af stað með þeim afleiðingum að bæði kraninn og göngubrúin skemmdust talsvert. Óhappið átti sér stað á mörkum Hafnarfjarðar og Garðabæjar, en nákvæmari staðsetning eða tímasetning liggur ekki fyrir að svo stöddu.