Ragnar Þór Ingólfsson og Linda Dröfn Gunnarsdóttir, framkvæmdastýra Kvennaathvarfsins, hafa undirritað samkomulag um 15 milljóna króna framlag til Kvennaathvarfsins en þetta kemur fram í tilkynningu stjórnvalda.
Markmið styrksins er að efla áfram þjónustu athvarfsins við konur og börn sem þurfa að leita skjóls vegna ofbeldis á heimili. Ragnar Þór segir mikilvægt að tryggja öflugt stuðningsnet fyrir þau sem standa frammi fyrir slíkum aðstæðum og að samkomulagið styðji við þá nauðsynlegu þjónustu sem Kvennaathvarfið veitir.
Kvennaathvarfið rekur athvörf bæði í Reykjavík og Akureyri þar sem konum og börnum þeirra stendur til boða öruggt skjól, ráðgjöf og stuðningur, óháð búsetu eða lögheimili.
Þá býður Kvennaathvarfið einnig upp á gjaldfrjáls ráðgjafaviðtöl og er vaktsími þess opinn allan sólarhringinn fyrir þolendur, aðstandendur og fagfólk sem leitar upplýsinga eða stuðnings.
