Ólafur Ragnar Grímsson, fyrrverandi forseti Íslands, og eiginkona hans, demantadrottningin Dorrit Moussaieff, eru í skilnaðarferli sem hefur ekki verið formlega lokið, samkvæmt heimildum Vísis.

Hjónin hafa verið gift í 23 ár. Þau sáust síðast saman opinberlega hér á landi við útför Davíðs Oddssonar í Hallgrímskirkju 13. mars síðastliðinn.

Undanfarin ár hefur Dorrit að mestu búið í Lundúnum en jafnframt dvalið reglulega á Íslandi, meðal annars á heimili þeirra í Mosfellsbæ sem þau fluttu í eftir að forsetatíð Ólafs Ragnars lauk árið 2016.

Mannlíf hafði reynt að hafa samband við Dorrit fyrir nokkru síðan, bæði símleiðis og skriflega en ekki fengið nein svör en í skriflegu svari til Vísis vildi Dorrit ekki staðfesta eða tjá sig beint um skilnaðarferlið. Hún sagði þó að þeim Ólafi Ragnari liði báðum vel og að þau væru góðir vinir.

Þegar Mannlíf spurði Ólaf Ragnar símleiðis um sögusagnir af skilnaðinum svaraði hann:

„Ég ákvað það fyrir löngu að svara ekki kjaftasögum.“

Aðspurður hvort ekkert væri hæft í þessu svaraði hann:

„Ég svara hvorki játandi né neitandi kjaftasögum.“