Leikarinn og leikstjórinn Aðalsteinn Bergdal er látinn, 76 ára að aldri, eftir baráttu við krabbamein. Hann lést á Landspítalanum við Hringbraut 28. maí síðastliðinn. Frá andlátinu segir Vísir.

Aðalsteinn, sem fæddist 1. desember 1949 á Akureyri, átti að baki meira en hálfrar aldar feril á sviði, í sjónvarpi og útvarpi. Hann er þó líklega best þekktur fyrir að hafa skapað og leikið trúðinn Skralla, sem skemmti íslenskum börnum og fjölskyldum þeirra um land allt í nærri fimmtíu ár.

Leikferill hans hófst á Akureyri á sjöunda áratugnum þegar hann fékk hlutverk í uppfærslu á leikritinu Sláturhúsið hraðar hendur. Síðar tók hann þátt í uppbyggingu Leikfélag Akureyrar sem atvinnuleikhúss og starfaði einnig um árabil hjá Leikfélagi Reykjavíkur og Þjóðleikhúsinu.

Á ferli sínum lék Aðalsteinn í vel á annað hundrað sýningum hjá atvinnuleikhúsum landsins. Hann leikstýrði einnig fjölda verka, talsetti hundruð teiknimynda, söng inn á hljómplötur og framleiddi barnaefni fyrir útvarp og sjónvarp.

Árið 2022 hlaut hann heiðursviðurkenningu Menningarsjóðs Akureyrar fyrir framlag sitt til menningarlífsins.

Aðalsteinn bjó síðustu ár í Hrísey. Eftir hann liggja sex börn, nítján barnabörn og þrjú langafabörn.