Lögregla í Frakklandi fann málverk eftir spænska listamanninn Pablo Picasso við húsleit sem framkvæmd var í tengslum við rannsókn á fíkniefnasmygli og fíkniefnaviðskiptum í úthverfi Parísar fyrr í vikunni.

Samkvæmt tilkynningu frá saksóknaraembættinu í Créteil, suðaustur af París, kom málverkið í leitinni þegar rannsakendur leituðu að sönnunargögnum í fíkniefnamáli. Í kjölfarið var einnig hafin rannsókn á meintum þjófnaði og meðferð stolinna muna.

Franska dagblaðið Le Parisien greindi fyrst frá málinu og sagði húsleitina hafa farið fram á mánudag í bænum Champigny-sur-Marne, austan við París. Auk Picasso-verksins fundu lögreglumenn kannabisefni, lúxusfatnað og nokkur þúsund evrur í reiðufé.

Saksóknaraembættið staðfesti að sérfræðingar hefðu sannreynt að um væri að ræða ekta verk eftir Picasso. Ekki hefur þó verið upplýst hvaða verk um ræðir né hvaðan það er talið hafa komið.

Fjórir einstaklingar voru leiddir fyrir dómara á föstudag vegna málsins. Yfirvöld hafa ekki gefið upp frekari upplýsingar um tengsl þeirra við málverkið eða fíkniefnarannsóknina.