Tveimur naggrísum var bjargað eftir að þeir fundust yfirgefnir í bænum Clacton í Englandi. Þar var á ferðinni Jade Millhouse sem var að ganga niður Colne Road þegar hún sá einhvern furðulegt á lóð við veginn. „Í fyrstu hélt ég að það væri dautt dýr þar til það hreyfði sig, og þá áttaði ég mig á að þetta var naggrís,“ sagði hún í breskum fjölmiðlum.

Jade fann kassa hjá Langtry hótelinu sem er nærri veginum og fékk ferskt grænmeti frá veitingastaðnum My Big Fat Greek Taverna til að reyna að lokka naggrísina til sín. „Ég áttaði mig á að eina leiðin inn á lóðina væri að klifra yfir girðinguna, en ég gat ekki hugsað mér að skilja þá eftir. Ég gerði mitt besta en ég var of lítil til að komast yfir, svo annar vegfarandi klifraði yfir og rétti mér naggrísina. Ástandið sem litlu dýrin voru í fékk mig til að gráta, með sköllótta bletti, ofvaxna mottaða feldi og sár á afturfótunum.“

Naggrísirnir voru færðir í dýraathvarf þar sem þeir fengu aðhlynningu hjá dýralækni.

Eigandi athvarfsins, Carol Jacobs, sagði við fjölmiðla: „Þeir eru mun öruggari og gefa frá sér lítil hljóð þegar ég kem inn í herbergið. Þessir naggrísir hafa greinilega fengið umönnun á einhverjum tímapunkti en síðan verið yfirgefnir þegar þeir þurftu mest á henni að halda.“

Naggrísirnir, sem hafa fengið nöfnin Simba og Sandy, munu dvelja í athvarfinu um tíma vegna aldurs. „Það er sorglegt að einhver hafi talið sig þurfa að gera þetta í stað þess að biðja um hjálp. „Þrátt fyrir að öll skjól séu yfirfull, ef einhver þarf bráðnauðsynlega á hjálp að halda, munum við alltaf reyna að gera það sem við getum. Ég skil ekki af hverju fólk yfirgefur dýr og sleppir þeim á hættulegum stöðum,“ sagði Jacobs.