Sjónvarpsmaðurinn og samfélagsrýnirinn Egill Helgason segir umfang auglýsingaherferðar samtakanna Áfram Ísland vera án fordæma hér á landi. Hann kallar eftir gagnsæi um fjármögnun herferðarinnar og segir þjóðinni bókstaflega drekkt í auglýsingum rétt fyrir þjóðaratkvæðagreiðsluna.
Miklar umræður standa nú yfir um umfang og fjármögnun þeirra auglýsingaherferða sem hafa verið undanfarnar vikur vegna komandi þjóðaratkvæðagreiðslu um Evrópusambandið. Egill Helgason, fjölmiðlamaður, tjáði sig um málið á Facebook-síðu sinni og sparar þar ekki stóru orðin um starfsemi samtakanna Áfram Ísland, sem berjast fyrir því að viðræðum verði hætt.
„Líklega hefur aldrei farið í gang stærri áróðursherferð á Íslandi en sú sem Áfram Ísland svokallað rekur nú,“ skrifar Egill. Hann bendir á að herferðin nái til nánast allra miðla og sjáist hvarvetna í samfélaginu: „Maður hlýtur að spyrja út í kostnaðinn og hverjir reiða fram allt þetta fé – það er bókstaflega verið að drekkja þjóðinni í auglýsingum á netinu, í sjónvarpi og á skiltum.“
Gagnrýnir rangfærslur en hrósar fagmennskunni
Egill gerir sömuleiðis alvarlegar athugasemdir við innihald auglýsinganna frá Áfram Ísland og segir gæði upplýsinganna ábótavant. „Alls kyns ónákvæmni í auglýsingunum og beinar rangfærslur vekja líka athygli – til dæmis hvernig hæpnum fullyrðingum er slengt fram í formi spurninga.“
Hins vegar segir hann ljóst að herferðin sé keyrð áfram af miklu afli og sérfræðiþekkingu, enda standi ein stærsta auglýsingastofa landsins að baki henni. „En vissulega er mjög fagmannlega að verki staðið,“ bætir hann við.
Herferð já-sinna sögð máttlítil
Að mati Egils er mikill munur á baráttu þeirra sem vilja áframhaldandi viðræður og þeirra sem vilja stöðva þær. Hann segir herferð þeirra sem hvetja fólk til að kjósa „já“ vera mjög slaka í samanburði. „Herferð já-sinna er mjög máttlítil miðað þennan flaum – og ekki nálægt því eins úrhugsuð.“
Egill lýsir jafnframt ákveðnum hliðum herferðarinnar sem „pínu hjákátlegum“ og nefnir sem dæmi boðaðan útifund þar sem fyrrverandi forsætisráðherra ætlar að skýra frá afstöðu sinni. „Nú er það kannski ekki ýkja spennandi – en þetta er augljóslega hannað af almannatenglum til að fá feita umfjöllun í fréttatímum rétt fyrir kosningarnar.“
Hann dregur þá ályktun að öll þessi atburðarás verði áhugaverð rannsókn í framtíðinni, „líka hvað varðar gildi þjóðaratkvæðagreiðsla,“ eins og hann orðar það að lokum.
