Paul Doyle, sem er grunaður um að hafa ekið á mannfjölda á sigurgöngu Liverpool, mun mæta aftur fyrir dóm þann 14. ágúst þar sem kemur í ljós hvort hann játar sök og undirbúningur hefst fyrir réttarhöld.
Í réttarfundi í Liverpool í morgun hristi 53 ára gamli Doyle höfuðið í vitnastúkunni þegar saksóknari sagði dómaranum að hann hefði „af ásetningi ekið á mannfjöldann“ og „notað bifreiðina sem vopn“. Doyle hefur verið ákærður fyrir sjö brot í tengslum við áreksturinn á sigurgöngunni.
Lögreglan í Merseyside greindi áður frá því að 79 manns hefðu slasast þegar bifreið ók inn í stuðningsmenn á Water Street um klukkan sex síðdegis á mánudag. Þegar ákærurnar voru opinberaðar í gær voru sjö manns enn á sjúkrahúsi.
Doyle er sagður hafa verið giftur konu sinni í 20 ár og er faðir þriggja ungra drengja á unglingsaldri. Fjölskyldan býr í einbýlishúsi með fjórum svefnherbergjum sem metið er á um 300.000 pund. Myndir á samfélagsmiðlum sýna fjölskylduna njóta frís á stöðum á borð við Disneyland í Flórída, Dubai og á ýmsum sólarströndum.
Óljóst er nákvæmlega hvað Doyle starfar við, en hann hefur gegnt ýmsum stjórnunarstöðum sem netöryggisráðgjafi, þar á meðal hjá heilbrigðisstofnun (NHS Trust). Samkvæmt LinkedIn-síðu hans er hann fyrrverandi sérsveitarmaður hjá breska sjóhernum (Royal Marine Commando) og talið er að hann starfi nú í netöryggibransanum.
Eftir að handtaka hans og nafn voru opinberuð hafa nágrannar lýst Doyle sem „indælum manni“ og „fjölskyldumanni“. Hissa íbúar í rólegri botnlangagötu þar sem hann býr með konu sinni og börnum sögðu við Mirror: „Þetta meikar bara engan sens.“
