Borgarstjórn samþykkti í gær breytingar á gjaldskrám sundlauga, Ylstrandarinnar og Fjölskyldu- og húsdýragarðsins með það að markmiði að gera þjónustuna aðgengilegri, sanngjarnari og hagstæðari fyrir íbúa, sérstaklega fjölskyldur og reglulega notendur en þetta kemur fram í tilkynningu frá borginni

Með nýju fyrirkomulagi er leitast við að umbuna fastagestum að sögn borgarinnar en á sama tíma tryggja að aðrir, þar á meðal ferðamenn, greiði nær raunkostnaði.

Verð á ársmiðum lækkar umtalsvert, eða um 21–77% eftir stöðum, og í fyrsta sinn verður hægt að kaupa ársmiða í áskrift. Árskort fullorðinna í sund lækkar úr 48 þúsund krónum í 34 þúsund, sem skilar verulegum sparnaði fyrir fjölskyldur.

Stór breyting er að öll reykvísk ungmenni 17 ára og yngri fá frítt í sund en hingað til hafa 16 ára og 17 ára þurft að borga sig inn og á Ylströndina. Þá lækkar árskort í Fjölskyldu- og húsdýragarðinn verulega fyrir bæði börn og fullorðna.

Breytingarnar taka gildi 5. maí en kosið verður í sveitarstjórnarkosningum þann 16. maí.