Lögfræðingurinn Árni Stefán Árnason var handtekinn í síðustu viku í tengslum við umfangsmikla rannsókn lögreglu á röð innbrota í eldisbú á höfuðborgarsvæðinu og nágrenni. Innbrotin, sem hófust í maí síðastliðnum, áttu sér stað í Stjörnugrís á Kjalarnesi, Reykjabúinu í Mosfellsbæ og Dalsbúi í Mosfellsdal. Frá þessu er greint á fréttavefnum Nútímanum.
Í aðgerðum lögreglu voru sími og fartölva Árna haldlögð og bifreið hans rannsökuð. Árni lýsir sjálfur harkalegri upplifun í samtali við Nútímann, en hann var fluttur í fangaklefa klæddur undirfötunum einum saman þar sem hann var vistaður í fjórar klukkustundir fyrir yfirheyrslu.
„Mér var komið fyrir í fangaklefa, klæddum undirfötunum einum. Ég fór mjög fljótt í gríðarlega geðshræringu og varð hreinlega hræddur,“ segir Árni og bætir við að það hafi verið svakalega óþægilegt að sitja í klefanum vegna saka sem hann tengist á engan hátt. Vegna ástandsins var kallað eftir aðstoð sjúkraflutningamanna sem mældu Árna með hættulega háan blóðþrýsting.
Hafnar sök og dregur lögmæti í efa
Árni hafnar alfarið aðild að innbrotunum og segir að lögreglan hafi aldrei spurt hann beint út í framkvæmd þeirra í yfirheyrslum, heldur aðeins um almennt viðhorf hans til málsins. Hann telur að handtakan og húsleitin tengist fremur eigin dýrahaldi og langvarandi deilum hans við Matvælastofnun (MAST) fremur en innbrotunum sjálfum.
Árni hyggst leita réttar síns vegna málsins. Hann telur að lögreglan hafi brotið gegn friðhelgi heimilis síns og að aðgerðirnar hafi farið langt út fyrir öll meðalhófspróf.
