Tónlistarmaðurinn og íslenskufræðingurinn Bragi Valdimar Skúlason gagnrýnir harðlega hönnun og prófarkalestur á límmiða sem lögreglan hefur dreift til grunnskólabarna. Á límmiðanum er orðið lögregla meðal annars ranglega skrifað „lógreglan“.

Bragi fjallar um málið í færslu á Facebook sem hefur vakið mikla athygli og fengið rúmlega þúsund viðbrögð þegar þetta er skrifað. Segir hann metnaðarleysi í hönnun og prófarkalestri hafa færst yfir ásættanleg mörk.

„Þetta fínerí fá grunnskólabörn afhent frá lögreglunni þessa dagana. Nei, ekki „lógreglunni“ eins og reyndar stendur þarna, heldur lögreglunni. Þið vitið, þessari sem á að gæta að lögunum og reglunum,“ skrifar Bragi.

Hann gagnrýnir jafnframt aukna notkun gervigreindar við gerð myndefnis og segir samfélagið í auknum mæli hafa sætt sig við að verk séu unnin án aðkomu teiknara, hönnuða og yfirlesara.

Listamaðurinn og tölvunarfræðingurinn Halldór Eldjárn tekur undir gagnrýnina og segist hafa sérstakar áhyggjur af gervigreindargerðu efni sem beint sé að börnum.

Að hans mati geti lélegt myndefni haft áhrif á fagurfræði og myndlæsi barna. Börn þurfi vandað og fjölbreytt myndefni til þess að þroska slíkt læsi.