Meðal verkefna lögreglu í dag samkvæmt dagbók hennar var tilkynning um ágreining milli tveggja aðila utandyra þar sem annar aðilinn átti að hafa sýnt ógnandi hegðun. Lögregla mætti á vettvang, aðskildi aðilana og stillti til friðar.

Þá var lögreglu tilkynnt um gesti á hóteli sem höfðu skilið herbergi sitt eftir í mikilli óreiðu. Við komu lögreglu voru viðkomandi farnir af vettvangi. Engar sjáanlegar skemmdir reyndust vera á herberginu, en það var mjög skítugt.

Einnig bárust tilkynningar um mann í annarlegu ástandi sem átti að hafa sparkað í strætisvagnaskýli. Þegar lögregla kom á vettvang var maðurinn farinn.

Þá er rannsókn hafin á innbroti í nýbyggingu þar sem farið var inn í húsnæðið og verkfærum stolið.