Lögreglan á Norðurlandi eystra varar almenning við svikapóstum sem nú eru í umferð og hvetur fólk til að sýna sérstaka aðgát þegar það fær grunsamleg skilaboð.

Í tilkynningu lögreglu kemur fram að þeir sem telja sig hafa orðið fyrir svikum af þessu tagi og tapað fjármunum eigi að hafa tafarlaust samband við viðskiptabanka sinn. Þar geti þeir fengið ráðgjöf um næstu skref og mögulegar ráðstafanir vegna svikanna.

Í framhaldinu er fólk hvatt til að tilkynna málið til lögreglu.

Lögregla minnir jafnframt á netbrotagáttina á Ísland.is, sem er aðgengileg undir flokknum „Samfélag og réttindi“. Þar er hægt að tilkynna netbrot til lögreglu, auk þess sem unnt er að tilkynna tilraunir til netbrota þótt viðkomandi hafi ekki orðið fyrir fjárhagslegu tjóni.

Svikapóstar eru gjarnan settir fram þannig að þeir virðist koma frá traustverðugum aðilum og geta haft það að markmiði að fá viðtakendur til að gefa upp persónu- eða greiðsluupplýsingar.

Lögregla hvetur því fólk til að vera á varðbergi gagnvart grunsamlegum tölvupóstum og bregðast hratt við telji það sig hafa orðið fyrir svikum.