Lögreglumaður í Kenía var handtekinn á fimmtudag vegna dauða bloggara sem lést í haldi lögreglu. Atvikið leiddi til mótmæla á götum höfuðborgarinnar Nairobi þar sem tvær bifreiðar voru brenndar og nokkrir mótmælendur særðust.
Mótmælendur fóru út á götur Nairobi, skemmdur eignir og kröfðust afsagnar háttsetts lögreglumanns sem hefur verið nafngreindur í málinu.
Albert Ojwang, sem bloggaði um spillingu á samfélagsmiðlinum X (áður Twitter), var handtekinn 6. júní í vesturhluta Keníu og fluttur 400 kílómetra leið til Nairobi. Lögregla sagði að hann hefði verið handtekinn fyrir að birta „rangar upplýsingar“ um háttsettan lögregluforingja. Tveimur dögum síðar lést hann á aðal-lögreglustöðinni í borginni. Samkvæmt lögreglu lenti hann með höfuðið í vegg fangaklefans. Amnesty International og fjölmargir aðgerðasinnar hafa vakið upp spurningar um þessa frásögn.
Ríkisréttarmeinafræðingur hefur nú hafnað skýringu lögreglunnar og segir áverka Ojwangs benda til barsmíða. Í réttarskýrslu kemur fram að hinn látni hafi verið með „höfuðáverka, þrýsting á hálsi og fleiri áverka víða um líkamann sem benda til líkamsárásar.“
Á fimmtudag lokuðu mótmælendur götu í miðborg Nairobi sem liggur að þinghúsinu, þar sem ríkisfjárlögin áttu að vera kynnt.
Lögregla beitti táragasi á mánudag til að tvístra öðrum hópi mótmælenda sem krafðist ábyrgðar í málinu.
Yfirvöld hafa tilkynnt að formleg rannsókn sé hafin á dauða Ojwangs.
William Ruto forseti Keníu sagði í yfirlýsingu á miðvikudag að dauði bloggarans væri „hjartnæmur og óásættanlegur.“
„Ég fordæmi eindregið allar aðgerðir og aðgerðaleysi, þar með talið vanrækslu eða refsiverða háttsemi, sem kann að hafa átt þátt í ótímabærum dauða hans,“ sagði Ruto.
Dauði bloggarans kemur tæpu ári eftir að nokkrir aðgerðarsinnar og mótmælendur voru drepnir eða numdir á brott af lögreglu í tengslum við mótmæli gegn fjárlagafrumvarpi. Þau mótmæli leiddu til ákalla um að forsetinn segði af sér, en hann hefur sætt gagnrýni fyrir það sem sumir kalla harðstjórnartilburði.
