Tveir pólskir ríkisborgarar hafa verið dæmdir í sex og átta mánaða fangelsi fyrir að hafa flutt samtals 473 grömm af kókaíni til Íslands.

Daniel Piotr Walus var dæmdur í átta mánaða fangelsi og Magdalena Sobczyk í sex mánaða fangelsi. Þau játuðu bæði sök.

Samkvæmt ákæru fluttu þau fíkniefnin til landsins 24. maí síðastliðinn þegar þau komu sem farþegar með flugi frá Katowice í Póllandi til Keflavíkurflugvallar. Kókaínið var falið í pakkningum sem þau höfðu innanklæða.

Daniel var með rúmlega 310 grömm af kókaíni í sínum fórum en Magdalena tæplega 163 grömm. Styrkleiki efnanna mældist 82 til 83 prósent og voru þau ætluð til söludreifingar hér á landi í ágóðaskyni.

Við ákvörðun refsingar var meðal annars litið til þess að hvorugt þeirra hafði áður gerst sekt um refsiverða háttsemi svo kunnugt væri. Þá taldi dómurinn ekki sýnt fram á að þau hefðu átt fíkniefnin eða tekið þátt í skipulagningu kaupanna og innflutningsins að öðru leyti en að samþykkja að flytja efnin til landsins.

Á móti vó að brotið var framið í félagi og um var að ræða sterkt kókaín ætlað til sölu.