Mikil sorg og áfall ríkir í franska þorpinu Fère-en-Tardenois í norðausturhluta Frakklands eftir að 14 ára stúlka var stungin til bana á leið sinni í skólann á miðvikudagsmorgun.
Samkvæmt upplýsingum frá saksóknurum fannst stúlkan alvarlega særð á götu í bænum, en hún hafði hlotið mörg stungusár á hálsi. Hún lést áður en björgunarsveitir náðu á vettvang.
Lögregla handtók síðar um kvöldið 23 ára atvinnulausan mann, sem býr hjá foreldrum sínum, í um 25 kílómetra fjarlægð frá þorpinu. Saksóknari segir að grunur leiki á að maðurinn hafi verið fyrrverandi kærasti stúlkunnar.
Íbúar bæjarins, sem telur um 2.800 manns og er vestan við Reims, hafa brugðist við harmleiknum með sorg og samstöðu. Hvítar rósir og kerti voru lögð við inngang miðskólans sem stúlkan sótti.
Öryggisgæsla var aukin við skólann þegar kennsla hófst á ný í dag og voru margir nemendur sýnilega skelfdir.
„Þetta er algjörlega hræðilegt,“ sagði móðir tveggja nemenda við fjölmiðla. Hún sagðist venjulega leyfa dætrum sínum að fara með skólabíl, en hefði viljað fylgja þeim sjálf í skólann eftir atburðina.
Yfirvöld hafa komið á fót neyðarþjónustu við skólann þar sem nemendum og starfsfólki stendur til boða sálfræðiaðstoð.
Að sögn lögreglu tóku yfir 85 lögreglumenn þátt í leitinni að hinum grunaða í gær
