„Lífið getur verið svo ótrúlega óréttlátt. Enn á ný fylgi ég vini síðasta spölinn — allt of snemma. Nú er það bernskuvinur sonar míns, Steinarrs Loga, hann Lolli, sem hefur kvatt, langt fyrir aldur fram.“
Þannig hefst Facebook-færsla Guðrúnar Öldu Harðardóttur, þar sem hún minnist æskuvinar sonar síns, Lofts Sveins Magnússonar, sem lést í mótorhjólaslysi á Miklubraut á dögunum.
Segir Guðrún Alda að Loftur hafi verið ljúfmenni út í gegn, ávalt broshýr og hlýr.
„Fimmtugur lagði hann af stað á mótorhjólinu sínu til vinnu og sneri ekki aftur. Lolli var ljúfmenni í gegn — alltaf hlýr og brosandi. Sem strákur kom hann oft heim til okkar að hitta Steinarr og varð fljótt kærkominn gestur og vinur heimilisins.“
Guðrún Alda segir Loft hafa snert hjörtu allra sem kynntust honum.
„Allir sem þekktu hann syrgja — því hann snerti hjörtu þeirra sem á vegi hans urðu.“
Því næst minnist Guðrún Alda sérstaklega á sterkan vinahóp Lofts, sem hefur staðið þétt saman á þessum erfiðu tímum og staðið við bakið á fjölskyldu Lofts á aðdáanlegan hátt.
„Hvað er það sem myndar ævilangt vinasamband? Mig langar sérstaklega að minnast á vinahópinn sem Lolli var órofa hluti af. Hópurinn er bæði stór og einstakur — tuttugu og þrír að tölu — og hefur alltaf staðið saman, sérstaklega þegar á reynir. Undanfarna daga hefur þessi hópur sýnt ótrúlega samstöðu, hlýju og stutt fjölskyldu Lolla af einlægni og nærveru. Það er dýrmætt að sjá vináttu sem þolir tímans tönn og heldur áfram að gefa. Það hefur verið áhrifamikið að fylgjast með þessum vinum vaxa og þroskast.“
Að lokum þakkar hún Lofti fyrir allt og vottar fjölskyldu hans samúðarkveðjur.
„Takk fyrir allt, elsku Lolli. Þú skilur eftir þig djúp spor í hjörtum okkar allra.Ég votta fjölskyldu Lolla innilegar samúðarkveðjur.“
