31 árs þriggja barna móðir lést eftir að hafa bjargað sjö ára syni sínum úr á í Illinois-ríki í Bandaríkjunum á sunnudag.

Konan, Angelina Khalimendik, var við veiðar ásamt þremur börnum sínum þegar yngsti sonur hennar lenti ofna í í Des Plaines-ánni.

Khalimendik brást þegar í stað við og stökk út í ána til að bjarga drengnum. Að sögn yfirvalda tókst henni að koma syni sínum að öðrum fjölskyldumeðlimi og þannig í öruggt skjól. Skömmu síðar fór hún sjálf undir yfirborð vatnsins.

Ættingi konunnar og nærstaddir vegfarendur náðu henni upp úr ánni og hófu endurlífgun. Sjúkraflutningamenn fluttu hana í kjölfarið á sjúkrahús en þar var hún úrskurðuð látin.

Lögregla segir að aðstæður í ánni hafi verið sérstaklega varasamar eftir óveður og miklar rigningar á svæðinu. Vatnsyfirborðið hafi verið hærra en venjulega og straumurinn þungur. Þá hafi fallin tré, greinar, grjót og annað brak leynst undir yfirborðinu og gert aðstæður enn hættulegri.

Rannsakendur telja ekkert benda til annars en að um hörmulegt slys hafi verið að ræða.

Eiginmaður Khalimendik sagði í samtali við CBS Chicago að hann hefði verið fjarri heimili fjölskyldunnar vegna vinnu þegar eiginkona hans fór með börnin þrjú að veiða.

Khalimendik lætur eftir sig ellefu ára dóttur og tvo syni, níu og sjö ára.