Á sama tíma og Morgunblaðið greinir frá því að móðurfélag útgáfunnar tapaði 348 milljónum króna í fyrra, hefur félagið, sem heitir Þórsmörk ehf, aukið hlutafé um 266.600.000 króna.

Að auki hefur félagið heimilað hlutafjáraukningu upp á 133.400.000 króna til viðbótar.

Þetta þýðir að útgáfa Morgunblaðsins getur á endanum fengið í heild 400 milljóna króna innspýtingu frá eigendum sínum.

Eigendur Morgunblaðsins eru fyrst og fremst öflugustu útgerðarfélög landsins. Þar á meðal eru Kaupfélag Skagfirðinga, Ísfélag Vestmannaeyja og tengdir aðilar, auk Lýsis hf. og tengdra aðila. Stærsti einstaki eigandinn er Guðbjörg Matthíasdóttir, sem fer með yfirgnæfandi hlut í félögum sem eiga 37,9% hlutafjár.

Meðal annarra eigenda eru síðan Sigurbjörn Magnússon, einnig þekktir fyrir að vera faðir Áslaugar Örnu Sigurbjörnsdóttur, þingmanns og fyrrverandi ráðherra, sem fer með um 7% hlut og er stjórnarformaður.

Hlutafjáraukningin hefur ekki verið tilkynnt til Fjölmiðlanefndar og er því ekki vitað hver fjármagnaði kaupin og sömuleiðis er óvíst hvernig fer með þær 133 milljónir króna sem heimilt er að auka hlutafé um. Ef marka má rekstur félagsins í fyrra myndi aðeins taka 127 daga að klára slíka hlutafjáraukningu til viðbótar með viðvarandi taprekstri samstæðunnar.

Útgáfa Morgunblaðsins hefur skilað tapi öll ár nema eitt síðustu 16 ár, frá því félagið fór í þrot 2009 og fékk afskrifaðan á fjórða milljarð króna þegar útgerðarfélög tóku hana yfir. Eina árið sem rekstur Morgunblaðsins hefur ekki skilað tapi reyndist vera árið 2013 þegar 6 milljóna króna hagnaður náðist. Síðan þá hafa tapast samtals tæpir tveir milljarðar króna á verðlagi hvers árs.

Haraldur Johannessen, framkvæmdastjóri og annar ritstjóri Morgunblaðsins á móti Davíð Oddssyni, sagði í viðtali við blaðið í dag að erfið samkeppni við ríkið og tölvuárás hefðu verið helstu ástæður tapsins. Þá sagði hann Morgunblaðið hafa fært fram nýjungar með nýju appi og dagskrárgerð, meðal annars þætti Stefáns Einars Stefánssonar.