Krónan hefur ákveðið að skipta aftur úr nýjum umbúðum fyrir nautahakk sem nýverið voru kynntar til sögunnar en athygli var vakin á því í Facebook-hópnum Matartips að pokarnir væru ekki í hæsta gæðaflokki.

Greinilegt hafa verið að lekið hafi úr pokunum.

„Við erum stöðugt að leita leiða til að draga úr óþarfa plastnotkun og nýju hakkumbúðirnar eru liður í þeirri vegferð. Sambærilegar lausnir hafa verið notaðar með góðum árangri erlendis og með breytingunni gátum við jafnframt boðið hentugra magn og lægra kílóverð,“ segir Guðrún Aðsteinsdóttir, framkvæmdastjóri Krónunnar, í samtal við Mannlíf um málið.

Hún segir hins vegar hafa komið upp tilvik þar sem saumurinn á umbúðunum hafi ekki haldið og leki orðið úr þeim. Slíkt sé ekki ásættanlegt og umbúðirnar uppfylli ekki þá gæðastaðla sem Krónan geri kröfu um.

Á meðan unnið sé með framleiðanda að lausn hafi því verið ákveðið að taka eldri umbúðirnar aftur í notkun tímabundið.

Biðjast afsökunar á málinu

„Heilt yfir höfum við fengið jákvæð viðbrögð frá viðskiptavinum varðandi breytingarnar og viðskiptavinir okkar virðast vera tilbúnir og opnir fyrir umhverfisvænni lausnum en auðvitað hefur galli í umbúðum haft neikvæð áhrif á upplifun og það er miður. Okkur þykir það mjög leitt og biðjum viðskiptavini okkar afsökunar á þeim óþægindum sem þetta kann að hafa valdið,“ segir framkvæmdastjórinn.

„Við viljum áfram vera óhrædd við að prófa nýjar og umhverfisvænni lausnir, en þær þurfa að sjálfsögðu að standast þær kröfur sem við og viðskiptavinir okkar setjum. Við vonumst til að geta leyst þetta hratt og vel og tekið nýju umbúðirnar aftur í notkun þegar við erum fullviss um að þær standist okkar kröfur.“