Nokkuð var um verkefni hjá lögreglunni á höfuðborgarsvæðinu í gærkvöldi og í nótt. Meðal annars var ökumaður stöðvaður á 190 kílómetra hraða þar sem leyfilegur hámarkshraði er 90 kílómetrar á klukkustund.

Ökumaðurinn var fluttur á lögreglustöð í kjölfarið og sviptur ökuréttindum vegna málsins.

Annar ökumaður var handtekinn vegna gruns um ölvun við akstur og látinn laus að lokinni sýnatöku. Þá var annar ökumaður, einnig grunaður um ölvunarakstur, handtekinn eftir að hafa reynt að hlaupa undan lögreglu. Hann náðist skammt frá bifreið sinni.

Lögregla stöðvaði jafnframt ökumann sem grunaður er um akstur undir áhrifum fíkniefna. Sá reyndist þegar sviptur ökuréttindum og var látinn laus að lokinni sýnatöku. Enn annar ökumaður var stöðvaður grunaður um akstur án ökuréttinda.

Lögregla var einnig kölluð að íbúðarhúsi eftir að bifreið hafði verið ekið inn í garð í kjölfar umferðaróhapps. Ekki er grunur um að ökumaðurinn hafi verið undir áhrifum.

Þá var lögregla kölluð til vegna líkamsárásar og er málið til rannsóknar. Einnig var tilkynnt um þjófnað í verslun og var það mál afgreitt með vettvangsskýrslu.