Það vakti mikla athygli og uppnám hjá mörgum Íslendingum þegar tilkynnt var um að ekki yrði leyfilegt að fara með tjaldstóla og regnhlífar inn á svæðið á Bergmál-tónleikunum sem hljómsveitin Kaleo hélt á Þingvöllum fyrr í júní.

Ástæða þess samkvæmt Lögrelgunni á Suðurlandi var ótti við að hægt væri að nota þá hluti sem vopn. „Við gerum því viðeigandi ráðstafanir til þess að forðast að slíkir hlutir rati inn á svæðið. Það er einnig sjónarmið að ef það kemur til þess að það þurfi að rýma svæðið með skömmum fyrirvara þá geta slíkir hlutir skapað hættu við þessar aðstæður,“ sagði Íris Edda Heimisdóttir, aðalvarðstjóri hjá lögreglunni á Suðurlandi, við RÚV um málið.

Hefur þessi ákvörðun hjá lögreglunni vakið upp spurningar um hvort standi til að banna regnhlífar og tjaldstóla á fleiri hátíðum í sumar og hafa tilvonandi Þjóðhátíðargestir haft sérstakar áhyggjur á samfélagsmiðlum.

Mannlíf hefur sent ítrekaðar fyrirspurnir á lögregluna í Vestmannaeyjum til að spyrja út í málið en ekki fengið nein svör. Mannlíf vildi einnig vita hverjar væru helstu öryggisáhyggjur lögreglunnar.