Pakistanska lögreglan greindi frá því í dag að 17 ára gömul TikTok-stjarna hefði verið skotin til bana af manni sem hafði ítrekað haft samband við hana á netinu.

Sana Yousaf, sem varð 17 ára í síðustu viku og var með yfir milljón fylgjendur á samfélagsmiðlum, var myrt á heimili sínu í höfuðborginni Islamabad á mánudagskvöld.

Lögreglan hefur handtekið 22 ára gamlan mann grunaðan um morðið, en hann hafði eytt löngum tíma hangandi fyrir utan heimili hennar.

„Þetta er mál þar sem höfnun hafði átt sér stað aftur og aftur. Strákurinn var stöðugt að reyna að ná í hana,“ sagði Syed Ali Nasir Rizvi, lögreglustjóri í Islamabad, á blaðamannafundi.

„Þetta var hrottalegt og miskunnarlaust morð,“ bætti hann við.

Yousaf var með yfir 800.000 fylgjendur á TikTok, sem er gríðarlega vinsælt í Pakistan. Hún birti þar myndbönd þar sem hún hreyfði varirnar við lög, gaf ráð um húðumhirðu og auglýsti snyrtivörur.

Síðasta myndbandið sem hún birti var nokkrum klukkustundum fyrir morðið, þar sem hún var sýnd skera afmælisköku.

Sumar athugasemdir undir samfélagsmiðlafærslum þar sem fréttum af morðinu var deilt gáfu í skyn að dauði hennar væri réttlætanlegur vegna starfs hennar á samfélagsmiðlum, í samfélagi þar sem heiðurshugmyndir setja konum þröngar skorður.

„Þú uppskerð eins og þú sáir,“ sagði í einni athugasemdinni.

Nighat Dad, baráttukona fyrir réttindum kvenna, sagði að slíkar athugasemdir veittu gerendum byr undir báða vængi til að „þagga niður í konum sem þora að láta sjá sig.“

„Viðbjóðslegar athugasemdirnar við fréttir af morðinu á Sönu eru ekki bara hatur – þær eru hluti af hugarfari sem réttlætir ofbeldi gegn konum í Pakistan,“ sagði hún í færslu á netinu.

Mikið ofbeldi gegn konum er algengt í Pakistan, samkvæmt Mannréttindaráði landsins, og ekki er óalgengt að konur verði fyrir árásum eftir að hafa hafnað bónorðum.

Árið 2021 var hin 27 ára Noor Mukadam hálshöggvin af pakistansk-amerískum kærasta sínum, Zahir Jaffer, eftir að hún hafnaði bónorði hans. Morðið vakti mikla reiði um allt land.

Árið 2016 lifði Khadija Siddiqui af eftir að fyrrverandi kærasti hennar réðist á hana og stakk hana 23 sinnum.