Langar raðir mynduðust í öryggisleit á Keflavíkurflugvelli í morgun og þurftu flugfarþegar að bíða töluvert lengur en venjulega eftir að komast í gegnum leitina en RÚV greindi frá.

Andri Ómarsson, staðgengill upplýsingafulltrúa Isavia, segir mikla sumartraffík og óvenjulágt hlutfall tengifarþega hafa stuðlað að töfunum. Þegar færri farþegar eru í tengiflugi þurfi hlutfallslega fleiri að fara í gegnum öryggisleit.

Þá sé mögulegt að farþegar sem áttu flug seinna um morguninn hafi mætt óvenjusnemma og þannig skapað tímabundinn flöskuháls. Að sögn Andra hafði þegar tekið að greiðast úr röðunum og engar tæknilegar bilanir komu upp í morgun.

Isavia hvetur farþega til að mæta tímanlega á flugvöllinn og nýta netinnritun eða sjálfsafgreiðsluvélar.

Tafir hafa komið upp á Keflavíkurflugvelli fyrr í sumar. Bilun í töskuflokkara olli meðal annars töfum við innritun og einnig hafa orðið tafir í vegabréfaeftirliti vegna nýs fyrirkomulags fyrir ferðamenn sem koma frá ríkjum utan Schengen-svæðisins.