Rapparinn Silentó, frá Atlanta, sem sló í gegn með laginu “Watch Me (Whip/Nae Nae)”, hefur verið dæmdur í 30 ára fangelsi vegna skotárásar sem leiddi til dauða frænda hans árið 2021.
Saksóknari í DeKalb-sýslu greindi frá því á miðvikudag að hinn 27 ára gamli tónlistarmaður, sem heitir réttu nafni Ricky Lamar Hawk, játaði sig sekan um manndráp af ásettu ráði, alvarlega líkamsárás og vörslu skotvopns við framkvæmd glæps. Hann var einnig sakfelldur fyrir að hafa reynt að leyna dauðsfalli frænda síns, Frederick Rooks III.
Lögregla fann lík Rooks þakið fjölmörgum skotsárum og voru skothylki á vettvangi. Myndbandsupptökur úr öryggismyndavélum sýndu Silentó síðar yfirgefa svæðið á hvítum BMW-bíl.
Rannsóknarlögregla notaði skotfæraprófanir til að para skothylkin við byssu sem fannst í fórum Silentó.
Tíu dögum eftir morðið játaði hann loks verknaðinn en sagði hluta ábyrgðarinnar hvíla á alvarlegum geðrænum vanda sem hann hafði glímt við frá barnæsku. Hann reyndi að taka eigið líf árið 2020.
Þrátt fyrir þessar ástæður taldi dómarinn að 30 ára fangelsisdómur væri réttmæt refsing.
