Reykvíkingur hefur verið ákærður fyrir skjalafals og umferðarlagabrot eftir að hafa ekið bifreið án ökuréttinda og framvísað mynd af fölsuðu ökuskírteini við lögreglu.

Samkvæmt ákæru lögreglustjórans á Norðurlandi eystra á atvikið að hafa átt sér stað laugardaginn 5. apríl 2025. Reykvíkingurinn ók þá bifreið um Hringveg í Hörgársveit þegar lögregla stöðvaði akstur hans.

Maðurinn er sagður hafa verið án ökuréttar og við afskipti lögreglu framvísað mynd af fölsuðu ökuskírteini. Er háttsemin talin varða við ákvæði almennra hegningarlaga um skjalafals auk ákvæða umferðarlaga.

Lögreglustjórinn krefst þess að Reykvíkingurinn verði dæmdur til refsingar og greiðslu alls sakarkostnaðar. Þá er þess jafnframt krafist að hann verði sviptur réttinum til að öðlast ökuskírteini.

Málið verður þingfest í Héraðsdómi Norðurlands eystra 1. október næstkomandi. Reykvíkingurinn hefur verið boðaður fyrir dóminn til að hlýða á ákæruna og halda uppi vörnum.